「陣亡」投行夥計豪玩

反傳統玩低調嘅投資銀行包括高盛、花旗、摩根士丹利及美銀等金融機構，今年都唔舉辦正式嘅聖誕派對和活動，畢竟本月初嘅全國調查，有三分之二美國受訪者都對金融行政人員有負面看法，若然喺咁嘅大環境下大搞派對真係找死。口痕友仲話，美國經歷前所未有嘅金融海嘯後，當地人心態係「憎人富貴嫌人貧」，奢華嘅活動可免則免。

呢批「幸存者」過節要節衣縮食，反而好多「陣亡」咗嘅投行就Happy得多，好似已經作古嘅貝爾斯登，有人報料話，大約100名貝爾斯登前夥計上周五去咗紐約西55街Dream Hotel嘅Rm. Fifty 5敍舊兼大團圓，呢間夜店標榜新哥德式嘅超華麗，一支Cristal香檳要賣成450美元。

另一批貝爾斯登前員工喺數周前就跑到東47街嘅Connolly’s酒吧相聚，呢間愛爾蘭酒吧距離昔日貝爾斯登總部只有幾個街口，依家喺慈善機構任職嘅Brannan就話，公司去年賣畀摩根大通嘅當日，大家就嚟咗呢間酒吧，今次就好似高中生畢業後嘅聚會。

余絲韻