引發大災難覺可恥

最近佢接受德國一本雜誌訪問，就被問到對上一次因為「賓卡」身份而感到羞恥係幾時，佢好堅定咁回答話，唔會為咗自己嘅工作而覺得羞恥。

不過，佢話之前幾年的確有部分環球業務係唔可以接受，有啲金融產品太過複雜，透明度又唔足夠，但銀行仍然賣畀啲唔知頭唔知路嘅人。呢類業務幾年來都好成功，但就引來一場大災難，佢哋都覺得咁係好可恥。

「大笨象」近年辣着咁多火頭，到底佢有冇畀教會嘅信眾指摘過？葛霖話好少，因為啲人都係有思想嘅，知道問題係好複雜。當然好多人覺得無咗份工係因為啲不負責任嘅金融從業員，特別係設計呢啲專業人士都睇唔明嘅金融產品，佢話絕對理解呢種憤怒。

對於信仰與追求盈利係咪兼容，葛霖坦言呢個係要面對嘅矛盾，亦係一定要解決嘅矛盾。

余絲韻