本文重點
立法會議員詹培忠、金利豐證券老闆娘朱李月華等人依家正喺賭城拉斯維加斯歡度聖誕，而恒豐證券老闆張華峰就啱啱結束賭城之旅返到香港，絲絲梗係第一時間問吓佢有無收穫啦，佢就話自己都係「細細哋」玩吓，佢已經有成10年冇去過賭城，今次玩咗5日，主要都係參觀吓當地新起嘅建築物，佢話間新酒店有成6,000間房，真係令佢眼界大開，加上啲建築設計巧奪天工，令人嘆為觀止！
Outlet掃貨 幾大碼都有
除咗參觀新建築物以及順道到三藩市探望細佬之外，張華峰今次其實都收穫甚豐。話說美國一向多特賣場（Outlet），大家都知張華峰身形有番「咁上下」，當地嘅Outlet就啱晒佢，因為幾大呎碼嘅衫褲都有。佢話嗰度嘅Outlet有齊XXXXL甚至XXXXXL碼，不過佢唔需要着咁大碼，XXXL（加加加大碼）就OK嘞！佢今次掃咗唔少恤衫、褲及大褸，價錢仲好平，普通牛仔褲只係賣百幾蚊美金，風褸亦只係100蚊美金。不過，佢最後睇吓個衫牌，原來全部都係「中國製造」。
賭城咁好玩，又有嘢睇、有嘢玩、有嘢買，點解留5日咁少？張華峰話要返嚟搵食喎。佢實在太謙喇，呢幾日港股都無市！
余絲韻