本文重點
繼金管局前總裁任志剛喺今年九月底榮休後，人稱YK嘅金管局副總裁蔡耀君亦會喺今年底正式卸任，YK希望退休後可以發展吓自己嘅興趣，譬如修讀歷史，甚至學打鼓彈吓Keyboard；不過，佢話首先想作深層休養，即係乜都唔諗，每日鍾意瞓到幾點就幾點，佢仲講笑，話最好去一個接觸唔到財經新聞嘅地方喎。
尋日嘅金管局簡布會，係YK退休前最後一次公開露面，新任金管局總裁陳德霖亦專登出席向佢致謝。陳總話喺過去兩次金融風暴中，香港銀行體系仍能保持穩定，YK居功至偉，認真畀足面。
海外信託事件最難忘
YK自七四年加入銀行監理處，喺九三年加入金管局，服務本港足足35年。要離開工作多年嘅崗位，YK坦言有啲離愁別緒，但慶幸有候任副總裁阮國恒接佢棒，所以並唔擔心。
回顧過去，YK話見過好多風浪，雷曼事件只係其一，雖然所帶嚟嘅工作壓力好大，不過講到最難忘，就唔及當年嘅海外信託事件，銀行監理處喺現場審查過程中發現銀行有問題，繼而將之接管，佢話整件事好有成功感。
余絲韻