買股僅9個月賺15萬

「聖誕老人」炒股都算叻，買咗股票只有9個月時間，已經將本金20萬元變成35萬元，今年可以買份大禮物獎勵自己。但佢就話：「股市難測，我嘅炒股經驗尚淺，投資知識與技巧始終唔夠，所以想搵個專家幫幫手。」孖妹自然有求必應。

高妹： 玩咗股票9個月，你已經淨賺15萬元，邊隻股票幫你賺最多錢呢？

聖誕老人： 係駿威汽車（00203），我喺3元買入66,000股，喺4.5元沽出，賺咗接近10萬蚊。

莉莉： 嘩！一次買賣就賺到10萬蚊，咁你喺股場上咪未交過「學費」？

聖誕老人： 梗係唔係，有次聽人講，喺10蚊買入金隅（02009），點知隻股一直跌，終於我喺9蚊止蝕沽出。呢次之後，我唔夠膽再買唔熟悉嘅股票。

睇啱潛力股唔怕「坐」

高妹： 咁你嘅投資方法係點樣㗎？

聖誕老人： 因為信心問題，我一向只買比較「大隻」嘅股份，當股價有5%升幅，我就會立即沽貨獲利，然後再連本帶利買其他股票；如果無咁嘅升幅，我就會由得佢擺喺度。

沈大師： 咁樣咪犯錯囉！有5%就「走」，無就「坐」，即係被迫短炒變長揸。其實如果你睇好一隻股票，相信佢未來會有增長潛力，就算股價跌緊，都應該「坐」到目標價先離場。

聖誕老人： 我主要係買中資股為主，如駿威、建行（00939）及中海集運（02866）等，應該比較安全啩？

沈大師： 又錯啦！買中資股唔代表無風險、股價唔會跌。舉個例，○七年工行（01398）股價試過見7.49元高位，之後港股大跌市，○八年工行最低跌到2.61元，跌咗65%；又好似國壽（02628），股價都可以由50幾蚊一度跌到10幾蚊。雖然佢哋嘅股價已升番上嚟，但唔係所有人都會有心機及勇氣去等。

大師貼士吼3隻靚股

聖誕老人： 你講得啱，我有時候都堅守唔到「5%增長策略」，忍唔住提早沽貨。

沈大師： 好似偉易達（00303）咁，呢隻係基金愛股，當年科網股爆破狂跌時，佢跌得好勁，但只要經濟好轉，佢就會升番，因為間公司做實業，年年交到業績，呢啲就係經歷好多風浪，但都會繼續成長嘅股票。

聖誕老人： 咁有乜嘢潛力股值得留意？

沈大師： 睇3至6個月啦，我估油價會上番85美元，到時美元會轉弱，可於11.5元買入中海油（00883），上望14蚊；第2隻就係紫金（02899），我估金價勢頭仲係向上，現價可買入，中長線睇10蚊；最後就係財險（02328），依家係落後股，上升動力大，現價買入，一個月睇8蚊。

做足功課 計啱條數

高妹： 沈大師仲有乜嘢投資心得可傳授畀聖誕老人呢？

沈大師： 千祈唔好用全副身家去買股票。其實，買股票與打功夫一樣，齋睇書係唔會識打嘅，一定要親身落場先得。

高妹： 吓？打功夫，買股票？即係點呀？

沈大師： 有三大重點，學習掌握股市周期嘅升跌情緒、分析股票嘅好壞質素、技術分析配合。投資前做資料搜集，加埋用生意頭腦去買股票，即係自己要識計啱條數，咁樣買股票信心自然足啦。

莉莉： 股友成日話炒股好似坐過山車，你又點睇？

聖誕老人： 買股票真係令人有好大心理壓力，每次做投資決定時，好似買邊隻股票、幾時沽貨咁，我個心情就會好忐忑同埋好緊張。

講咗咁耐，大家係咪好想知道「聖誕老人」嘅廬山真面目呢？開估啦，其實「聖誕老人」係由本地製作公司Dreams Entertainment老闆朱榮德（Ju）所扮。雖然過去兩年喺生意上都賺唔到錢，但阿Ju坦言：「已經唔做唔得，因為十二月一到，我已經接到唔少電話要Book聖誕老人，不過可以帶畀別人歡樂，我真係好開心。」

生意難做，阿Ju今年聖誕節搵到童裝廠商贊助禮物，又搵到一班「扮嘢」經驗豐富嘅朋友扮演聖誕老人，務求將服務質素提升，希望每位客人都擁有開心又溫馨嘅聖誕節。

散戶估恒指跌到萬九

聖誕願望人人有，不如我哋又聽吓訊滙證券旺角分行嘅散戶有乜嘢聖誕願望？散戶廖先生話「大勢不妙」，恒指已跌穿21,400點，跌勢料會持續落去，佢嘅聖誕願望係恒指喺20,200點見到支持，明年首季港股比A股升多啲！另一散戶呂先生覺得恒指會跌到19,000點先會停定，聖誕願望就係港股再創新高，恒指明年底有機會上28,000點。

今年股市、樓市皆暢旺，相信普遍投資者都有賺錢，相比去年，唔知各位今年聖誕節又會唔會增加消費呢？據《東方產經》網上民調截至上周末晚上6時結果，話會增加消費嘅有29.3%，話消費額與去年相若嘅有22.3%、話會減少消費嘅就有48.4%。嚟緊星期五就係聖誕節，孖妹預祝各位股友「聖誕超級快樂」。

莉莉、高妹

若有料報畀高妹同莉莉或有嘢問，可電郵money.biz@opg.com.hk