傳銀監會要求內地銀行提高資本充足比率去到12%水平後，中央再有防範流動性過剩的舉動，防止資產泡沫形成。星期三，國務院撤回出售二手樓個人轉讓營業稅務優惠，筆者認為，今次中央向樓市投機活動示警，多於真心要樓市回落，既然打算揸貨超過兩年的，無論以中港兩地標準，大抵已經屬於用家及投資者居多，超出炒家範疇。而且，中國出口未恢復到海嘯前水平，經濟情況未明朗，貿然對樓市落重藥，一旦樓價掉頭向下，財富萎縮效果必定對消費造成影響，與明年「搞活內需」的經濟主題背道而馳，肯定非中央現階段所願見。

家電與汽車產業傾斜政策，會維持幾耐，同樣像賭公字一樣，大家仲係估估吓，基於家電及汽車股今年累積升幅驚人，筆者相信再追值博率唔高。反而按部就班退市計劃下，明年內地有機加息一至三次，其實保險產業，會相對受惠，至少在定息回報投資上，會由○八年、○九年的谷底逐漸回升。

三大保險公司之一，太平洋保險（02601）正招股，下周定價，26.8元至30.1元招股價範圍，以A加H共86億股股本，上限定價的話市值2,588億港元，相當於○九年盈測不少於65.1億元人民幣的35倍，比國壽（02628）的31.9倍高少少，但低過中國平安保險（02318）的38.2倍，招股價總算在合理範圍內，用白表公開認購，最終分得些少，不如買現成兩隻保險股好過。

未來幾年前景不俗

平保公布首十一個月保費收入資料，四間子公司共交出1,588.4億元人民幣保費收入，同比升34.9%，增長驚人也遠遠超越保險業平均水平。股民或對海嘯前平保在富通一役滑鐵盧仍耿耿於懷，但長遠兩大內地保險巨頭更專門化，國壽手執壽險牛耳，平保投向綜合金融平台發展，各有所長。

預期保費增長及投資收益隨定息收入水漲船高，平保未來幾年前景閃亮。唯獨一○年市盈率都在30倍樓上，令人難以取捨，未敢放膽一拚，假如能夠回試中期上升軌底部，大約65元至66元水平，吸引力更大。

戴峰修