老闆四代都做木匠

譚木匠所用嘅公司標誌，粗線條嘅圖畫狀似木刻，上面可見到一個樸素嘅工人，隔籬有「我善治木」四個字。絲絲聽老友講，「我善治木」係文言文，意思即係「我最叻做木製品」，原來譚木匠老闆譚傳華屋企四代都係做木匠，呢四個字可以話係實至名歸。

譚氏家族歷史原來都幾辛酸，話說譚傳華曾祖父嗰代已開始做木匠，都算薄有名氣，但因為佢爺爺唔生性，將整個家業輸得一乾二淨，其後因為打仗去世，所以家道中落，佢爸爸接手先至有番啲起色；不過，譚傳華後生時因為意外失去右手，後來仲因為想做詩人、畫家而離家出走，佢話自己當時幾乎餓死街頭，後來覺得自己始終係做木匠嘅命，先至接手家族生意，點知後來愈做愈好，依家仲終於上市。譚傳華就將家史裱喺公司一間店舖上面，勉勵嚟幫襯佢嘅客人添。

余絲韻