本文重點
家陣喺中國做官真係唔易，好似國資委主任李榮融咁，佢話喺國資委做嘅6年裏，「質疑」與「罵聲」一直都陪住佢，而「壓力」及「鬱悶」就係家常便飯咁滯，點解會咁？
事關早幾年啲央企收入及利潤年年係咁升，佢以為實會有餐安樂茶飯啦，點不知，就畀人寫咗篇「央企為甚麼這麼紅」嘅文章嚟質疑央企做乜賺咁多錢，點解都唔過啲畀央企主人家——即係公眾。
之後國資委要整合央企，出現咗好多收購兼併，啲人又話央企要搞「國進民退」迫死啲民企；搞到連中糧集團董事長寧高寧曾幾何時都頂唔順出聲話，出售國企又話賤賣國有資產，買嘢又話國進民退，咁國企點做先啱呢？
堅信「國企強則國強」
睇嚟國企未來點搞仲有排「煩」，但有壓力嘅李榮融一直堅信「國企強則國強」，佢嘅夢想係希望終於有日，世界五百強嘅榜上有50間係嚟自中國，而呢個夢想從來都無動搖過。
余絲韻