本文重點
繼蒜頭與辣椒好似啲股票咁畀內地人炒到㷫合合後，家陣啲辣椒由於有外國貨入市，供應增加令到價格企得唔係咁硬，於是啲中間商都開始喺高位出貨，唔通呢次「蒜椒泡沫」終於爆破？其實啲人已開始去炒薑啦，貪佢有「甲流感概念」以及減產喎。
早輪內地啲人將啲蒜頭當黃金咁炒，搞到蒜頭仲貴過豬肉，售價升幅跑贏A股，炒風亦都來去如風，無幾耐啲「炒家」—中間商走晒去炒同樣「有甲流感概念」嘅辣椒，因為市傳藥用辣椒精及辣椒素可以抗甲流感，搞到辣椒價格爆升咗成兩倍有多。
「甲流感概念」當炒
有位綽號「廣州辣王」嘅大哥話，呢排有大批印度辣椒入咗東莞，搞到呢排身價以倍上升嘅辣椒價格跌咗3至5個巴仙。好多炒家見勢色唔對，惟有沽貨離場，不過呢啲游資又搵到投資新產品—生薑，事關廣州市場啲生薑價格一日高過一日。
據講除咗甲流感概念之外，啲人炒得咁犀利亦都基於種植面積減少、持續乾旱以及寒潮令今年辣椒及生薑減產喎，聽落好似有道理咁，不過嚟緊巴西及泰國都會有大批薑入口中國，睇嚟啲內地炒家真係要小心賠了夫人又折兵喇。
余絲韻