本文重點
香港會計師公會尋日改選新一屆嘅理事會，結果由怡和管理公司財務總監馮英偉當選會長，而兩名副會長則由德勤合夥人蔡永忠同埋思捷（00330）財務總監周福安擔任，理事會舊人好似丁偉銓同龔耀輝繼續當選，而新人就有馬振峰入局。
提升本地業界競爭力
馮英偉當選後好開心，佢話自己入咗會計師公會都好耐，就好似打工人人都想做老細咁，自然想更上一層樓，依家就得償所願「升呢」，由副會長升做會長。
喺過去一段時間，會計師公會都有啲較具爭議性嘅課題。馮英偉話未來兩年公會將投資3,000萬元加強培訓及支援，提升業界競爭力，又會好好與年輕一代溝通，其餘工作包括處理內地會計準則及國際準則趨同嘅顧問工作、爭取為會計行立法確定責任上限等。
至於唔少人憂慮內地會計行可以行大陸嗰套幫H股做審計，會同本地會計師爭生意，新一屆班子就話其實佢哋已經爭取咗好多嘢，例如未來港企返內地上市都可以用本港會計行，而且內地會計行嚟香港都要請人。歐盟依家又認可內地會計準則，香港唔認可嘅話就會減低競爭力。
余絲韻