白承睿獲委任集團執董

至於香港投資者好熟悉嘅渣打亞洲區行政總裁白承睿（Jaspal），就會加入董事局做執行董事，唔知呢個委任係咪因為渣打喺印度發行預託證券（TDR）已進行得如火如荼，所以拉埋印度人Jaspal「入局」，等佢可直接喺董事局提多啲意見呢？佢哋嘅委任會喺一月一日正式生效。

現時嘅渣打執董Gareth Bullock會喺明年五月前退休，49歲嘅Jaspal就頂佢個位，繼續負責亞洲地區嘅增長及管治工作。Jaspal話可以喺集團董事局中代表亞洲嘅視野及目標，實在感到非常驕傲喎！事實上，Jaspal仲係繼前主席戴維思後，第二位駐香港代表入董事局，絲絲覺得香港都可以叨吓光呢！

渣打董事會明年上半年起仲會將現有審核及風險委員會嘅工作分開，風險委員會負責監督風險管理工作及檢討風險管理架構成效；審核委員會主力監控渣打嘅財務報告、合規及內部監控環境整體情況，加強企業管治。

余絲韻