杜拜多間政府企業被人「降呢」，「杜彈」再襲香江，滙控（00005）狂插水，拖累恒指又唔見多三舊。雖然大市跌得咁急，但整體股仔炒風依然未變，紅籌股續炒重組概念，炒友仍忙個不亦樂乎，近期股仔氣勢勁，正所謂早買早着，遲買瞓唔着。
近期啲配股威力認真唔講得笑，好似香港體檢（00397）配股後，股價較配股價飛升咗一倍，隻航天萬源（01185）配完股後，又係炒唔停，計吓計吓又升近倍。
之前同樣配過股嘅中國大冶有色金屬（00661），十一月底以0.64元配股，可惜配股後遇上市況急散，股價亦隨之回落去配股價，不過近期見佢慢慢從低位炒上，呈現一個小圓底回升形態，走勢相當靚仔。照計配股貨源盡入強者手，今次炒上量度計要見1蚊應該無難度，0.68元支持力唔錯，可以作止蝕位。
古晨