杜拜危機再次引起環球市場憂慮，而杜拜債權人大笨象（00005）同埋渣打集團（02888）表現當然唔精神，大笨象全日跌2.6%，而渣打更跌4.16%。過去九個月，環球股市已累積相當龐大升幅，調整壓力明顯增加，所以市場一有風吹草動，都會成為跌市藉口，古勝估計類似杜拜世界事件，未來會陸續發生，所以現階段都係審慎為上，不宜太過進取。

港股有機會跳彈床

恒指昨日收市再次失守50日線，而過去幾次，恒指跌至此水平都會有反彈，而昨日現貨收市之後，期指就急抽，期指最後仲高水成155點。假如外圍股市醒醒定定，唔排除港股今日有運行，乘機反彈。

祖國公布十一月乘用車銷量達104萬輛，按年升98.2%，數據表現強勁，但係一眾砵砵車昨日未有受數據刺激，只有吉利汽車（00175）繼續逆市做好，其他都唔多精神。其實北大人不斷推出政策支持汽車業，而且砵砵車股低位承接力都好強，睇格局整固完有機會再挑戰高位，所以唔怕逢低吸納。

祖國啱啱開完中央經濟工作會議，講到明為保宏觀經濟政策嘅連續性同埋穩定性，會繼續實施積極嘅財政政策同埋適度寬鬆嘅貨幣政策，而明年重心之一就係擴內需，在國家政策支持下，內需股長遠當然可以睇高一線，所以大市雖然偏軟，一眾內需股表現依然硬淨，百麗國際（01880）昨日仲逆市上升1.69%，而且係連升兩日。

百麗係內地大型女裝鞋零售商，自有品牌包括Belle、Joy&Peace

同埋Staccato，代理品牌有Elle、Geox 同埋Clarks，呢啲牌子香港唔少女性都相當熟悉，而祖國女士亦相當喜愛，隨着祖國女士的收入增加，消費力亦大大提高，對中高檔鞋履需求亦自然增加，有利百麗發展。

目前百麗嘅銷售網絡分布祖國主要城市，既然祖國擴大內需，百麗自然不敢怠慢，積極開設分店，估計今年鞋類業務新店舖會增加600至700間，明年新店應會進一步增加，務求令佢旗下品牌市場佔有率進一步提升。

內需概念最為吃香

上半年全球經濟不景氣，但祖國經濟增長依然唔錯，故百麗上半年盈利依然錄得增長，截至六月底止半年，純利有11.4億元人仔，表現的確唔錯，而值得留意係，集團同店銷售增長加快，九至十月期間同店銷售增長達9%至10%，估計係分店數目增加同埋同店銷售增長雙雙帶動下，盈利前景當然可以睇高一線。

除咗鞋類業務外，百麗亦有經營運動服飾銷售，代理嘅品牌包括Nike同埋adidas等大牌子，相信有助擴闊收入來源，對盈利當然有利，難怪大行認為其估值不貴，並予「買入」評級。百麗內需概念吃香，昨日雖然跌至9.36元低位，但喺10日線水平承接唔錯，最後仲倒升收場，而且成交亦明顯增加，睇格局隨時可以突破10元大關，挑戰12元水平。

古勝