本文重點
全球最大氧化鋁生產商俄羅斯鋁業聯合，雖然前日上市聆訊未能成功「闖關」，今年底前上市夢碎，但係公司尋日就突然高調宣布，邀請咗香港商品交易所主席張震遠，同埋基本法委員會副主任梁愛詩做獨立非執行董事，顯示公司有意透過招攬重量級人物，希望能對上市起積極作用。
冀增企業管治信心
俄鋁上市暫時未能成功「闖關」，除咗債務問題備受注目之外，據聞另一個關注點係公司嘅企業管治。搵到兩個猛人入局，亦可望對公司嘅企業管治增強信心。
據絲絲記憶所及，梁愛詩以往好少做上市公司獨立非執董，今次加入俄鋁，都算係非常畀面。至於張震遠，家陣正瞓身搞商品交易所，俄鋁係全球其中一家大型資源類公司，大家一拍即合絕對唔出奇。
俄鋁行政總裁兼大股東Oleg Deripaska就話，俄鋁對中國同亞洲市場一向都好有興趣，一直都搵緊熟悉區內市場嘅董事為公司提供寶貴嘅意見，梁愛詩具備法律知識；張震遠則是亞洲商品及交易市場嘅專家，所以兩個人都係最佳嘅人選。
梁愛詩就話希望運用自己嘅知識同經驗，協助俄鋁鞏固專注亞洲市場嘅全球鋁業領導者地位。
梁愛詩嘅委任現已生效，但張震遠將會喺俄鋁即將上市前才加盟董事會。
余絲韻