本文重點
可能已屆年尾，係埋單計數嘅時候，近期好多銀行都有獎攞，之前恒生銀行（00011）先至喺○九年亞洲銀行競爭力排名中獲得「最佳個人金融服務銀行」，依家又輪到渣打奪得由「銀行家」雜誌（The Banker）頒發今年度「香港最佳銀行」獎，呢個好比全球銀行奧斯卡頒獎禮，渣打能在眾多香港銀行中脫穎而出，而且仲係第一次攞得呢個獎。
撞啱喺佢哋今年慶祝在香港成立150周年嘅日子，榮獲此殊榮，可謂喜上加喜，相信渣打香港CEO洪丕正見到呢個獎項都飲得杯落，話晒喺呢個150周年大前提下，個個都做到索晒氣，依家可以話辛苦都值得啦。
威盡亞洲 今年攞獎最多
講開又講，渣打又幾巴閉喎，今次唔只喺香港攞獎，佢哋喺文萊、尼泊爾、南韓亦同獲最佳銀行獎，而亞洲最佳銀行亦落在渣打手上，佢哋今年係奪得最多獎項嘅一年，渣打嘅代表喺倫敦舉行嘅頒獎禮上攞獎都攞到手軟。至於中國最佳銀行獎就冇外資銀行份，而係由中行奪得。
余絲韻