本文重點
恒大地產（03333）上市後，主席許家印即時成為中國首富，股份掛牌當日唔少傳媒叫許生講吓成為首富嘅感想，佢話諗都冇諗過；尋日恒大開記招公布賣樓數據，記者問番同一條問題，許家印仍然係話：「冇感覺」。
提醒員工股東先係老闆
如果成為中國首富都冇感覺，咁究竟公司上市對許家印最大嘅意義係咩呢？許生就話，恒大上市之後，佢日日喺度諗點樣搞好間公司，股份掛牌唔夠兩日就即刻同員工開會，叫員工要有新思維、新標準，唔好再覺得自己係為老闆打工，而係為股東打工。而佢自己，亦會為股東「打好份工」，相信小股東最希望都係聽到呢句說話嘞。
絲絲仲八到，許生除咗叫員工改變思維之外，恒大上市後佢仲即刻加咗員工人工，有個咁識做嘅老闆，班伙記做嘢都落力啲啦！
余絲韻