尋日大市雖然回吐264點，但市場氣氛一啲都唔差，熱錢集中狂炒股仔，唔少二、三線股愈炒愈熱，市場消息多多，市場大炒紅籌重組及注資概念，總之係停不了炒作。
五礦集團係內地大型國企資源企業，位列世界五百強之內，今年六月曾以過百億元收購咗澳洲OZ MINERALS企業，十一月時又再傳出有意收購湖南有色集團嘅資源。五礦集團半年內動作多多，原來跟集團有意一體化上市有關。近期五礦集團已初步完成對五礦建設（00230）注資嘅後期工作，現時正集中資源搞五礦資源（01208）。
有消息指五礦集團屬意將全數礦務資產注入五礦資源，藉此達到一體化上市目的。○八年，五礦集團總營收達1,846億元人民幣，尋日兩隻股份雙雙逆市炒上，空穴來風未必無因，五礦資源初啟動，應更具值博率，暫時向上睇3.3元，止蝕可定於2.1元。
古晨