瘋狂派對尚未荼靡

大戶一向擅於製造「技術陷阱」，依家恒指距離50日線只係百零點，又係考驗大家投資智慧嘅時候，係唔係再一次畀大家低吸機會呢？之後會唔會再一次創新高令冇貨者追悔莫及呢？會唔會終須「狼來了」呢？古勝烏卜卜，只抱住一向「炒股唔炒市」嘅原則，尤其呢排好多二至九線嘅股好似升到唔識收掣，「瘋狂派對」仲未有散band迹象。

前一晚，花旗冇乜經濟數據公布，走勢非常牛皮，依家炒美國幾時加息，變咗升跌由大戶主導，經濟數據好時話會提早加息，反之亦然。

講開股仔，尋日隻香港體檢（00397）一支箭狂飆，話批股搞薄膜光伏組件，變身成為另一隻太陽能股，而且係搞「薄膜」，即係同近期表現標青嘅紅發（00566）同一概念。紅發升幅超過3倍，體檢只係剛起步，值得關注。其實蔡加怡等高層早排已辭職，十月尾、十一月初亦有基金在市場狂沽，明顯已係新人事、新作風。

介紹上市仍待改善

尋日又有公司以介紹形式上市，個名「心連心」（01866）令人以為係婚紗店，但原來係搞化肥。經過上次隻亞果（00073）出咗事，今次港交所（00388）實行「少做少錯」，喺大利市機再冇打出資產淨值或參考價，只係叫大家睇番招股文件算數。

但隻心連心一樣係虎頭蛇尾，隻股前日喺新加坡收市唔夠3蚊，尋日喺香港開市冇耐已炒高至10蚊，收市得番5.2元。鬼咩！介紹形式上市，只得喺星洲有貨嘅股東至可以「高沽」，香港普羅股民一係追貨、一係得個「望」字。看來港交所對於介紹形式上市，應該仲有好多可以改善嘅地方。

就快有隻中國玉米油（01006）上市，用玉米提煉嘅產品肯定以粟米油最為人熟悉，加上近排中國食用油漲價，食正呢排炒內需概念，相信招股反應會唔錯。其實，用粟米提煉嘅產品好多，包括澱粉、飼料、糖、味精、化工產品等，香港亦有幾間上市公司屬於呢類玉米加工股。

呢類股呢排最勁非中國澱粉（03838）同阜豐（00546）莫屬，前者古勝喺上月中已推介過，信者已賺到笑；而阜豐連續兩年都業績大豐收，做味精做到佢咁發，真係諗極都唔明，但成班管理層趁高集體減持，而減持發生喺公布「10個月盈喜」之後，係咪有景轟就唔敢估。

近日走勢相對落後

另有一隻值得留意嘅係西王糖業（02088），已係連升4日至2.13元，10日線升穿50日線，但同八月高位2.55元仍有一段距離，八月時糖價飆升，令西王糖同大成糖業（03889）一齊「嗒糖」，現時糖價仲高過八月，啱啱發完盈警嘅大糖仍然處於高位，比較之下，西王糖有追落後價值。

西王糖主要產品係結晶葡萄糖，可用於食品同飲料，呢排內地食品漲價，連帶啲食品飲料股都炒高，西王糖亦算係受惠股，博佢上番2.5元都有唔錯水位，止蝕位放在1.9元。

古勝