本文重點
本港土地供應持續短缺，市區具重建潛力舊樓，成為投資者及發展商搜購目標，忠誠拍賣部總經理鄭世傑同Vincent講，昨日佢哋以開價一千五百萬元賣出首次推出嘅九龍基隆街五號全幢舊樓；事實上，近排該公司接獲不少全幢物業委託拍賣及查詢，反映該類物業需求好大。
鄭世傑話，昨拍賣售出五項物業，當中基隆街舊樓面積約三千七百方呎，現為住宅及商業用途，以開價賣出。
夾屋成交額破紀錄
至於同場拍賣嘅何文田常盛閣中層凶宅單位，開價五百八十萬元，最後未有買家承價而收回。另傳媒人程翔昨亦有到場參觀，佢話間中都會去拍賣場睇吓，都有入市打算。
今年私宅樓價急升，連帶夾屋樓價都被推高。中原黃良昇同Vincent講，今年首十一月二手夾屋買賣登記有二百八十二宗，成交額六點八四億元，同舊年全年比較多百分之四點一及二點七，而登記總值更係九九年有紀錄以來最高。
至於今年首十一個月，以將軍澳叠翠軒錄得登記最多有六宗，而上個月做價最高嘅登記，係鴨脷洲悅海華庭一座高層Ｈ室單位，成交價達三百四十八萬元。
（Vincent Lau）