「地球先生病咗啦！」呢句廣告對白大約十年前出現，當年政府推動環保的工作當然唔及依家咁多。當時已經有民間自發環保活動。早於政府推出廢物分類計劃前，一班清潔工人早就會將收到的垃圾分類，因為可以將呢啲有用垃圾變賣賺外快，酒樓工人亦會好有心收集汽水罐同紙皮箱變賣。

藉上市增環保意識

後來屋邨清潔工作外判，禁止員工變賣垃圾賺外快，清潔工人自然唔再「搞環保」啦，之後由政府推出廢物分類處置措施。與其花咁多錢宣傳，不如容許清潔工人賺外快啦，肯定落力過依家。正如近年有唔少回收公司到處收舊報紙，依家連電線、舊鞋都收，我阿媽不知幾落力幫我收拾睇完嘅報紙雜誌。

唔知一眾環保概念股會唔會因為氣候會議炒一轉，但長遠嚟講，如果多啲環保工業股上市，話唔定可以提高大家環保意識，你揸咗隻股票都想佢好生意，又一誘因令大家支持環保。

「海嘯2.0」憂慮又漸漸畀我哋忘記，恒指似乎又再向23,000點關口進發。留意吓幾個國家央行的舉動，睇落佢哋對杜拜債務唔多擔心。好似澳洲繼續加息，歐洲央行又放口風話準備「退市」。

金融市場回復穩定，經濟復甦當然係好事，但如你認為目前市況係因資金太過鬆動有一點泡沫的話，我哋應有心理準備承受「退市收水」帶嚟的短暫波動，唔好掉以輕心。

大健