擅電腦作曲 出埋CD

「歐洲股神」早喺今年初已確認牛市重臨，威水史係佢將隻基金資產值由1,000英鎊「Run」（管理）到148,200英鎊，28年間增長147.2倍，咁嘅成績全賴所信奉嘅「逆向投資法」，主打分析長達30至40年嘅市場估值嚟「Pick bottom」（撈底）。

其實股神自細受爸爸和契媽嘅薰陶，培養出音樂天分，莫扎特係佢最鍾意嘅作曲家之一。身為業餘音樂家嘅佢讀大學時已經開始寫曲，執筆寫詞就好少，今年佢出咗隻CD，入面收錄晒親自寫嘅歌，股友可以上網聽試聽版，感受歌劇式音樂幾咁宏偉與和諧。呢排股神搞緊隻中國新組合基金，不斷忙着開會和接受訪問，孖妹見佢時已面露疲態，但佢走到鋼琴前即時變得雀躍，隨手輕鬆地彈奏一兩節歌。

股神邊彈邊講，「作曲基本上係靠鋼琴，但我彈琴唔算叻，因為寧願花時間即興作曲多過學習樂理。當完成首歌嘅旋律後就靠電腦程式「Sibelius」執音，好方便㗎，利用內裏8種樂器合成埋啲聲，每次完成一部分就會擺落部「iPod」度聽番，覺得邊度有問題就等夜晚返到屋企用電腦再執。」

藉音樂鬆弛投資緊張

莉莉︰ 用電腦程式寫歌劇，股神你都好「In」，你投資咁叻，有冇喺曲譜中搵到投資契機？

股神︰ 其實投資與作曲好唔同，當我作出投資決定時，就會好專心工作，但當想放鬆心情時，就會選擇作曲，喺咁緊張嘅投資環境，音樂都有啲幫助。我諗投資與作曲唯一有關聯嘅，係兩者都由數字組成，音樂嘅數字你可以細心聆聽，投資嘅數字只係一個量化結果，兩種數字我都好鍾意。

高妹︰股友輸錢時又可以聽乜嘢歌紓緩一下呢？

股神︰聽歌可以暫時忘記所有事情，咁你哋鍾唔鍾意音樂？

高妹︰我好鍾意唱歌㗎，不過當我畀蟹貨綁住嗰陣，就多數聽流行曲解悶。

股神︰我建議聽莫扎特嘅《魔笛》（Magic flute），集多種樂器於一曲，如豎琴、圓號、長笛和巴松管等，音樂好美又充滿魔幻，令人聽完好舒服。哈！股友亦可以聽我寫嗰首《A Kiss for the Baby》。

莉莉︰平時要寫歌又要投資，你點樣分配時間？

股神︰前兩年執教時就多啲時間寫歌，依家搞緊新基金都只係盡量抽時間聽歌。前幾個月我一直忙緊與中資企業高層見面，通常都會見5至6次才會做投資決定。

中港牛市持續多幾年

高妹︰ 中港股市升咗咁多，點解你仲夠膽揀呢個時候入貨？

股神︰ 一個升得快嘅市場如果冇人投資，就叫泡沫，有人投資就係牛市，我認為家陣嘅升市好正常。去年表現好差嘅股份包括商品及周期性股，今年都做得好好，依家股市只係牛市一期，明年會出現更多爆升股，投資者要睇定啲。歐美喺低經濟增長下形成咗低利率環境，對股市有幫助，我諗歐美第二期牛市會喺今年底或明年首季出現。

莉莉︰ 依家中港嘅牛市又喺第幾期？

股神︰ 中港情況就唔可以一概而論，雖然好難估計中國未來10年有幾多增長，但我相信，長遠嘅投資回報一定比歐美及英國市場吸引，但投資者要留意中國股市嘅波幅比較大，而且要睇政局形勢。我認為依家中港嘅牛市只係過咗一年，未來仲會持續多幾年。

高妹︰ 一般嚟講，你啲股票通常會揸幾耐？

股神︰ 每次我習慣揸18個月先放，今次到大陸投資，我持股策略與管理以往基金一樣，預計揸18個月，時間方面確實比傳統嘅中資管理公司耐咗啲。我認為依家中國股市嘅估值仍算合理，未去到好貴。

莉莉︰ 如果畀你揀多次，你想做作曲家定係基金經理？

股神︰我好幸運做到基金經理，同時又好享受作曲，好難揀。

66.3%股友未敢「淘金」

對於「歐洲股神」嘅資產升幅有成百幾倍，可能有啲人覺得唔算多，當散戶買中一隻消息股時都賺到，但股神卻係長勝。孖妹好認同佢嘅金句，「做一件事，一日唔難，難在一輩子」，每人都有輸嘅時候，當你買乜輸乜時，你仲有冇信心繼續買？

見到有咁多錢湧入，魚缸散戶近期唔係好怕買貴貨，不過連「四叔」都呻走寶嘅黃金投資，就好似唔係太多人敢追入。據今期《東方產經》網上民意調查，截至上周末晚上6時，較多人（66.3%）唔打算現階段購買黃金或相關資產，只有33.7%人話會買番。

莉莉、高妹

若有料報畀高妹同莉莉或有嘢問，可電郵money.biz@opg.com.hk