花旗市場開始正常化，花旗國政府去年借出嘅大筆「茄薯」亦慢慢開始回籠，美銀上個禮拜四宣布，會提前償還250億美元，而華府今次出手救美銀，最終非但唔使貼錢，仲有25億美元賺，不過美國班議員仍然對伯老毫不客氣，喺聽證會上瘋狂追殺，伯老亦承認低估咗今次危機嘅嚴重性，而佢亦唔排除會利用加息手段，去壓制泡沫再形成。伯老開到聲話會請「息魔」出山，商品市場即時立立亂，油、金同時間一齊腳軟，美元反彈，花旗魚缸回吐，孖屐現時賭提前於明年六月加息嘅機會率，已經升至超過五成。

魚缸大漲小回格

全球低息環境，造就熱錢四出搵銀嘅機會，祖國今年應可順利「保八」，turbo引擎依然開行油，相對歐美兩地滿目瘡痍，自然吸引唔少熱錢東來，金管局上個禮拜五又再向市場注資38億元，本地魚缸在水浸之下，相信仍會以大漲小回格局發展。

過往十一月一向都係內地屋仔市場嘅淡季，經過十月份熱賣之後，市場通常都會回一回氣，然後再衝春節前嘅高峰，不過今年十一月份銷售表現卻異常靚仔，令人憧憬春節前內地屋仔市場可能再起高潮，而上個禮拜一眾紅色地主股亦見起哄，隻合景（01813）禮拜五再抽升5.2%，都算有晒交代。

紅色地主齊起飛

趁勢當炒唔好畀佢停，花樣年（01777）剛上市無幾日，就遇上杜拜事件，搞到股價曾失守2元關口，但事實上基金大戶一直睇好佢台戲，「高佬盛」就喺2元附近加碼增持咗7,000萬股，真係身體力行，上個禮拜一眾紅色地主股先後落鑊，花樣年就壓住壓住咁，死都唔穿2.3元，但見到「你戇」密密手係咁買。集團共持有1,088萬平方米嘅土儲，現時開發中嘅項目共有29個，其中11個喺成渝經濟區，14個則位於珠江三角經濟區，大部分均集中喺較富裕嘅地區，主要係因為旗下樓盤多以高檔形式發展。近日紅色地主股重新起飛，花樣年雖然上場時間較短，但勝在未大炒過，上市時又得到咁多名人入飛撐場，「高佬盛」2元入貨價多少有鐵底味道，趁近日資金大舉追捧紅色地主股之際，花樣年仲處於低位未行，值得小注入市博一博。

古勝