大大間金舖都執笠

「細細個行過金飾舖，見到啲黃金閃吓閃吓，覺得好得意，於是以『黃金存摺』方式買咗幾錢足金當做儲蓄。」Johnny話當時讀緊小學，本金只係零用錢及利是錢，唔夠錢買到一両金。點知過咗幾年後，間金舖居然執咗笠，雖然最後可以拎番少少錢，未至於血本無歸，但眼見咁大嘅金舖都可以突然間冇咗，Johnny當時已意識到交易對手違約風險呢個問題。

同好多小朋友一樣，兒時嘅Johnny都鍾意玩電視遊戲機，仲試過打機打到上電視。「兒童節目《430穿梭機》曾有個打機嘅擂台遊戲環節，我寄信報名參加，再經過一輪面試，成為最後16強後就可以上電視比賽。」雖然Johnny最後於兩強止步，無緣成為台主，但佢話有機會親眼一睹當時偶像譚玉瑛姐姐及張國強哥哥嘅風采，仲被張國強讚係打機高手，經已心滿意足。Johnny最近重遇兒時偶像張國強時，仲特登同對方影相留念。

余絲韻