本文重點
金管局旗下嘅香港印鈔公司，話晒全港嘅銀紙都係喺呢度印製，所以守衞十分森嚴，一般人好難有機會入去參觀，不過傳媒朋友就好榮幸，喺金管局特意安排下，尋日可以入去睇吓印銀紙嘅成個過程，並由副總裁余偉文（Eddie）親自帶隊，當然每個人包括印鈔廠職員都要經過檢查程序。
紙鎮紀念品值13.8萬？
鈔票印製過程都相當精密，分為5個步驟，並有多個檢測過程，所以市民想試圖喺市面搵張錯體鈔票都好難。絲絲記得對上一次有咁嘅安排，已經係9至10年前嘅事，當時帶隊嘅人就係已離開金管局嘅任總。
每次參觀完後，金管局都會致送紀念品畀傳媒，上次係由100蚊廢鈔製成嘅紙鎮，事隔咁多年後，雖然通脹唔係好犀利，但今次紀念品玩「升呢」，係由約138張碎毀咗嘅金牛廢鈔壓成硬塊而成嘅紙鎮，咪睇小呢舊只有5公分高嘅廢鈔硬塊，已經價值13.8萬大元，如果真係用得嘅銀紙，相信就更令人開心。
余絲韻