梁麗珊新職月內揭盅

絲絲知道過埋今日，新一代「輪后」荷合股票衍生部助理董事梁麗珊（Lisa）就會離開做咗兩年嘅崗位，市傳將會加盟荷銀。當絲絲打電話畀Lisa求證時，佢話依家唔可以公布住，但就叫絲絲唔使心急，因為喺今個月佢就可以用新公司嘅身份同大家見面，到時就一清二楚。

「空穴來風，未必無因」，其實傳聞咁講都唔係無道理，因為荷銀股票衍生工具及私人投資產品董事何啟聰（Ivan）亦已經喺上月辭咗職，照計都需要搵人頂替番佢個位。

何啟聰去向撲朔迷離

至於Ivan嘅新去向就比較撲朔迷離，據知佢將會過檔一間全新嘅輪證發行商做「開荒牛」。市傳明年會加入輪證市場嘅名單，除咗渣打集團（02888）外，建行（00939）及工行（01398）亦都密鑼緊鼓。早前傳聞Ivan會加盟渣打，但最新又有傳佢過檔中資銀行，亦有人估係轉去花旗。以上傳聞孰真孰假，真係惟有等Ivan過完冷河期，等明年一月先證實到喇。

余絲韻