「杜拜事件」漸退，港股連彈四日，歐美經濟未真正復甦，中東又傳不穩，全球熱錢流晒入亞太區搵食。內地今年「保八」應無問題，全球超低息環境下，借美元投資內地，成為最新投資途徑，港股既有資金自由出入嘅便利，又有間接投資內地之機會，自然成為熱錢嘅避難港，難怪金管局接錢接到手軟。
大市逐個板塊炒，內地污染嚴重，如何發展環保能源成為首要任務，今年七月內地所推出嘅「金太陽計劃」，正正以補貼形式，希望加速太陽能行業嘅發展。上市不久的卡姆丹克（00712），本身主攻單晶太陽能晶錠及晶片，上市時已受到各界關注，上市後股價見一浪一浪咁收集，現時愈收愈高，尋日古晨見佢成功破頂，但成交唔大，正正係沽壓減少，貨源歸邊嘅訊號，睇來距離入大直路不遠矣。暫定目標為3.2元，止蝕位就定於10日線的2.22元。
古晨