本文重點
豹紋再度成為今年秋冬時裝最潮元素，無論係高貴華麗嘅服裝抑或係輕便衣着，都離唔開動物圖案。證券商協會副會長蔡陳葆心原來就係豹紋嘅忠實擁躉，絲絲日前經過中環，巧遇蔡太同兩個契女結伴行街，三人全部一身豹紋打扮，與周圍衣着灰灰黑黑嘅路人甲、乙、丙相比，絕對搶晒鏡。
一屋豹紋 襯衫要全套
蔡太唔單止係香港股壇前輩，仲係走在時裝潮流前端。蔡太話佢唔係依家先跟風鍾意豹紋，喺幾十年前已經係豹紋嘅忠實fans，屋企四周圍都可以見到豹紋產品。當日見到蔡太穿着嘅豹紋大褸，更加係專程由加拿大買番嚟嘅真豹皮，不但貴氣逼人，寒流侵襲時着上身真係暖笠笠㗎。
豹紋圖案雖然又靚又有型，但係都勁蝦人着。蔡太就教大家，着豹紋衫一定要全身襯晒一套先好睇，好似佢自己，雖然因為眼部做完手術，醫生建議唔可以喺頭髮上「動手腳」，不過襯番一頂豹皮帽一樣可以壓到場。可惜因為香港靚嘅豹紋產品唔多，蔡太大部分嘅豹紋衣物都要由親友為佢專程喺外國搜羅番嚟。
最近寒流襲港，絲絲就建議各位後生女不妨考慮做番個潮流達人，話晒灰黑色打扮雖然穩陣，但係單一嘅色調有時都真係幾沉悶㗎！
余絲韻