上星期二，因為唔使返學校嘅關係，我就趁得閒陪阿媽到藥房同超市入貨。去到藥房，阿媽即刻掃貨，佢話無論面膜、廁紙或者洗頭水等日用品，藥房都平過兩大超市一大截。照正常計，兩大超市嘅議價能力應該大大高過藥房，但係點解藥房賣得平咁多? 我覺得藥房好可能係用蝕本價賣日用品博取客人青睞，等客人買吓買吓，唔覺唔覺買埋D高毛利率嘅成藥，Total計埋都可以賺番少少。不過，藥房咁做都有風險㗎，如果遇到我阿媽呢挺精明師奶，齋買日用品，佢就會攞唔到着數，好可能仲要倒蝕返轉頭。
業主加租隨時轉蝕
其實超市都經常用呢招，不過割價傾銷嘅成本，通常都會透過加上架費去轉嫁畀供應商。始終超市掌握住控制權，大不了唔畀供應商啲貨上架，咁供應商實死無生，所以正常嚟講只能妥協。為咗呢個問題，阿媽都同我呻過好多次，因為佢正職係美國一間大型日用品公司嘅採購員，經常都要同超市傾數，睇下啲上架費可唔可以平番啲。
照咁睇，超市咪「賺到笑」? 咁大家又諗得太過簡單，超市都有弱點㗎，就係佢哋嘅邊際利潤極低，同埋個舖面面積一般較大，假如業主加租，隨時由賺變蝕。兩大超市之所以屹立不倒，某程度上係因為佢哋部分舖唔使擔心加租，母公司都係經營地產，包保唔會隨便加租。近年嚟，內地都有幾間超市企業喺香港上市，大家如果有興趣投資嘅話，不妨睇吓邊間企業係自己買地起舖，相信佢哋未來發展應該較有優勢。
少年股神 洪龍荃
○四年時年僅十六歲，參加花旗集團舉辦的一個模擬投資比賽「少年股壇挑戰賽」，並勇奪冠軍，因而獲得「少年股神」稱號。年紀輕輕的他，在股市裏已賺到人生第一個100萬，並曾出版投資理財書籍以及獲頒傑出青年領袖名銜。他現時就讀中文大學英文系三年級。