28/11/2009

播放本新聞相關短片
查詢股票編號

絲絲講場:華創黎汝雄「回歸」唔慣

已調任做華創(00291)副董事總經理超過半年嘅黎汝雄,原來至今仍未習慣同適應,莫非係與之前長駐內地有關?

佢話之前長駐無錫,時不時都有工作應酬在身,但最晏都係夜晚8點就可以返屋企,有好多私人時間,佢當時仲成日可以收工後約吓朋友唱K,而且一個禮拜都可以去做3次SPA。

調咗嚟香港梗係無呢支歌仔唱啦,每日瞓覺時間都未必夠之餘,住嘅地方又細咗好多添。絲絲記得本月初見佢嘅時候,佢為咗公司嘅收購項目,搞到成日冇得瞓,近期華創嘅公司活動真係好多,難怪佢做到氣咳。

享天倫之樂順番晒

不過咁,絲絲知道佢回歸香港終於可與家人結束長達9年嘅大陸、澳洲兩地生活,老婆仔女都返晒嚟香港,所以幾夜幾辛苦佢都可以享受到天倫之樂,咁就乜氣都順晒啦,所以佢講乜嘢都係笑笑口好開心咁樣囉。

經常周圍飛嘅佢仲教咗絲絲三個秘技,去醫治去到新地方水土不服,就係多啲瞓、多飲水同埋記得食當地整嘅山水豆腐,佢縱橫咁多地方咁多年,都係全靠呢個秘方先咁健康。

余絲韻