本文重點
唔經唔覺，「靚太」高靜芝嘅財匯局主席任期已到，政府尋日宣布佢再「冧莊」，任期3年。高靜芝由財匯局初期成立至正式運作，一直都有參與，可謂有份「湊大」財匯局，由佢再出任主席亦係不二之選。
一般嘅「靚太」平時都會愛去Ball場同Shopping，但高靜芝好喜歡做公職，回饋社會。佢係婦女事務委員會主席、社區投資共享基金委員會副主席及嶺南大學校董會副主席。
關百忠加入當成員
財匯局仲同時加入3名生力軍成員，其中一個係剛離開滙豐金融服務嘅關百忠，佢喺滙豐金融已做咗廿幾年，係名副其實老臣子。前幾日絲絲見到佢，問佢有乜新動向，佢答話依家放緊假，估唔到數日後，佢已獲委任做財匯局成員。關百忠亦係證券及期貨事務上訴審裁處成員。
至於中信泰富（00267）執行董事莫偉龍，就會卸任財匯局成員。去年中信泰富炒燶外匯Accumulator事件被證監會調查，作為董事嘅莫偉龍亦與其他董事一樣，確認受證監會就公司嘅事務進行調查。
余絲韻