K11快開幕好着緊

老友又話，新婚不久嘅Adrian第一個Baby即將誕生！吓，咁快？老友即刻笑言，Adrian個BB就係尖沙咀河內道項目個商場K11，原來K11可望喺下月中開幕，所以Adrian都好緊張，凡事親力親為。

Adrian平時做嘢咁大壓力，原來佢好鍾意飲茶紓壓，因為茶有甘味、有清香，任由選擇，就像細味人生。此外，Adrian自小就好喜歡運動，小學時曾攞過全校游水冠軍，到高中又鍾意打網球；早前佢更與大學同窗好友黃健華合作成功收購NBA騎士隊，佢佔15%股權，成為首位入主NBA嘅香港老闆。老友話Adrian好熱衷體育事業，遲啲仲會喺K11購物商場引進高級限量版嘅體育用品商戶。

除咗運動，Adrian亦好鍾意寫嘢，除了自己嘅Blog外，佢亦會喺集團刊物《新語》寫稿，今期佢就與一班年輕人分享，原來創意總是躲在「魚與熊掌」之間，而矛盾就係創意之母。

余絲韻