本文重點
近一年來iPhone及Android呢兩個智能手機平台嘅人氣急升，曾一度雄霸智能手機市場嘅Windows Mobile（WM）聲勢卻似乎有所下降，數碼通（00315）總裁黎大鈞尋日爆料話，公司嘅分析數據顯示，iPhone與Android用戶嘅平均數據用量，竟然較WM多出5倍咁多，睇嚟微軟喺這場智能手機大戰中，似乎確係暫輸一仗！
智能手機助提升ARPU
數碼通喺出售由Google力推嘅不同Android手機之餘，亦為自購iPhone上台嘅客戶提供補貼，黎大鈞話，公司對智能手機嘅補貼雖然較傳統手機為高，但由於數據用量嘅增加對提高ARPU有幫助，埋單計對成盤生意有利。事實上喺過去12個月，數碼通嘅智能手機用戶已大升七成，當中有25%係使用iPhone或Android，佢更認為呢個比例會再升。
但話分兩頭講，iPhone同Android近期咁受市場關注，無非都係由於呢兩個平台有較多應用軟件或遊戲提供畀用戶，事實上，WM以及由諾基亞主導嘅Symbian S60平台正喺呢方面急起直追，呢場智能手機平台爭奪戰有排打，但對手機網絡商嚟講，相信會帶來更多商機！
余絲韻