本文重點
香港主張男女平等，好多大公司嘅高級管理人員都係女性。不過，非牟利機構公益企業聯同英國克蘭菲爾德管理學院尋日發表嘅「二○○九年度恒生指數企業女性董事概況」研究報告指出，本港42家恒指成分股企業共585個董事職位中，只有52個（8.9%）由女性擔任。
中資更重用女高層？
研究報告仲包括一個「企業女性董事比例排行榜」，絲絲出奇地發現頭10位嘅企業之中，中資公司佔咗一半，排首位嘅係建行（00939），女性董事會成員佔29.4%；相反，外資公司就只有太古打入十大。
贊助呢項研究嘅渣打銀行，佢哋嘅亞洲區行政總裁白承睿話，渣打喺香港有5,300名員工，其中58%係女性，而高管當中，女性佔比例係33%；佢又好自豪咁話，渣打之所以安然度過金融海嘯，其中一個原因係佢哋了解不同市場、文化及性別嘅差異，以切合不同客戶所需。
余絲韻