本文重點
滙豐銀行陪住港人成長，相信唔少人仲記得上世紀九十年代嘅「滙豐三劍俠」，即係九十年代出任滙豐銀行主席嘅葛賚、做過滙控（00005）主席嘅浦偉士及龐約翰。葛賚早前去世，尋日絲絲就出席咗追思會。
鄭海泉朋友身份致辭
葛賚雖然祖籍英國，但喺香港出世，所以同班香港下屬似乎特別夾，好似現任滙豐銀行主席鄭海泉（Vincent），就係其中一個曾與葛賚共事，並結為好友嘅同僚。葛賚喺九六年退休，佢曾經透露其叔公、父親及佢自己都打滙豐工，叔公駐守大陸，父親則曾主管重慶及上海業務，葛賚嘅姪兒就喺佢退休後入埋滙豐。
Vincent唔單止喺追思會上以朋友身份致辭，仲憶述兩人工作時嘅對話，顯示葛賚平易近人及幽默嘅一面。Vincent又同絲絲講，原來佢哋喺滙豐財務部認識，以前去英國度假都有去葛賚屋企借宿，所以今次佢咁突然走咗，都好傷心。
現場所見，傷心嘅又豈止Vincent，因為葛賚生前曾做過好多間公司嘅董事，仲有數不盡嘅公職，所以喺尋日都有過百名有心人參加追思會。
余絲韻