上證認真搞嘢，禮拜二大跌完，禮拜三即有反彈，點知尋日跌得仲甘。上證咁跌法，港股難免要腳軟軟，即時唔見咗四舊，雖然氣氛係差啲，但古晨覺得啲股仔仍有鑊氣，無乜點受大市影響，正所謂炒股唔炒市嘛，不過A股咁跌法，睇怕都要小心啲，唔排除短期會有個較大調整。
所謂民以食為天，中央有心以內需推動經濟，糧食股自然可以睇高一線，中糧控股（00606）近期強勢，全因班基金睇重佢未來兩年嘅增長，尤其係佢嘅油籽加工業務，今年上半年受海嘯影響，估計全年埋單計可能會出現輕微倒退，但明年預期可有高達四成嘅增長率，再加上大米貿易亦錄得較預期出色嘅表現，難怪近期唔少大行都改口睇好中糧，喺尋日咁嘅市況都逆市炒上穿頂，應該係突破嘅先兆，暫時向上睇12元，可考慮以8.5元作為止蝕位。
古晨