本文重點
4G嘅發展如火如荼，依家唔少電訊公司都諗住用LTE（Long Term Evolution）行4G，香港移動通訊（CSL）尋日就開設咗亞洲首個LTE商用測試網絡基地，仲會喺中環甚至長洲等地方做測試，好可能喺明年十二月就可推出商用服務。CSL行政總裁羅啟迪話，雖然3G仲可以用一段時間，不過佢哋有需要展開4G測試，睇吓唔同情況下嘅效能係點。
贏速度對手眼紅？
佢哋近年大力投資基建，好似流動寬頻服務Next G自三月份推出後，數據流量已增加咗15倍。不過近期CSL有個主要對手提出以後電訊公司賣廣告，唔應該再標榜最高速度係幾多，而應該話畀客戶知佢哋用嗰陣可以有幾快，唔係嘅話就好誤導喎。
羅啟迪對呢件事就好似唔係幾開心，佢話呢間公司當年賣廣告嗰陣都係標榜自己個網絡可以有幾快，但當CSL嘅網絡超越咗佢哋嘅時候，就話電訊公司唔應該再用以前嘅做法。佢仲話CSL呢幾年嘅投資係對方嘅幾倍，現時CSL個網絡已經係無處不在喇。
余絲韻