渣打嘅新交易室位於國金二期12及15樓，佔地3.5萬平方呎，合共容納440名員工，主要從事證券銷售、外匯等交易。彭達賢帶領傳媒參觀15樓，邊行邊介紹每一個部門，佢作為導賞員十分稱職。

彭達賢導賞帶睇魚缸

行到休息室附近，彭達賢專登停低，畀傳媒欣賞一下擺放喺嗰度嘅金魚缸，裏面養住好多鮮艷奪目嘅熱帶魚，彭達賢笑笑口咁話，佢哋兩層辦公室都各有一個金魚缸作為風水擺設。

其實都唔難理解嘅，香港係渣打股票業務嘅全球樞紐，依家生意愈做愈大，除咗進駐國金二期開設呢個屬於渣打全球最大嘅交易室（以每層樓面計），仲有環球市場全球主管坐鎮，自然希望財源滾滾來啦！

彭達賢仲透露，佢嘅新辦公室比舊嘅面積細一半，但佢似乎一啲都唔介意，笑言公司有會客室，自己唔需要太大嘅辦公室，亦唔想佔用太多空間。佢仲話為咗環保，每層交易室只有4部影印機，希望減少用紙。

余絲韻