對沖基金經理新搞作

先講「阿Son」，佢靠睇中咗美國次按風暴，當時大手沽空次按等動作，令佢大賺200億美元，自然成為最受人注意嘅對沖基金經理。佢今次要搞隻專門投資黃金相關股份及衍生工具嘅基金，目標係跑贏金價，據說佢向投資者推介隻基金時話，依家金價只係啱啱開始升。

假設你有幸可以投資呢隻基金，毋須睇好金價，只要問自己信唔信得過「阿Son」。既然隻基金係投資黃金衍生工具，自然可做好及做淡，除非唔畀做淡，但「阿Son」作為對沖基金經理，無理由會咁樣限制自己，即係只要「阿Son」睇啱個勢，自然有方法賺錢。「阿Son」會唔會實際係睇淡金價呢？

金價愈升愈要做淡？

問題係「阿Son」睇中次按危機係撞彩定係有料，咁今次會唔會照樣係咁，惟有拭目以待。

到講「金」嘞，我做咗少少金價統計，現貨金年初至今已升約30%，截至本月中，過去10年金價升幅2.8倍，大大跑贏恒指唔夠60%嘅升幅。咁高回報係咪大上大落？唔係，金價過去連續9年錄正回報，即係至少唔使輸。年尾似乎係買金時機，統計過去10年每月金價平均回報，只有三月、六月、七月及十月係負數，更重要係一月、二月、十一月及十二月連續4個月平均回報係正數。

呢排多咗人留意黃金窩輪，「順勢而行」真係咁難？過去一個月金價不斷升，但同時間黃金認沽證街貨亦不斷升，黃金認購證街貨就下跌，即係話金價愈升愈要做淡。

投資當然最怕「輸」，但我就怕執輸，買埋本「Kindle」電子書，新玩具到手，下次再講。

大健