藍籌引入內企非壞事

要見證恒指踏入「花樣年華」嘅歲月，當然要搵夠分量嘅指數始創人關士光，其實當初創立恒指嘅Idea，來自已故恒生銀行創辦人之一嘅何善衡，何博士眼見美國有道指，點解香港無反映本土股市嘅指數？所以喺1969年佢就叫身為銀行研究部主管嘅關士光着手草擬。

關前輩現年84歲，早喺25年前已定居多倫多，適逢佢本自傳《龍與皇冠—香港回憶錄》面世，莉莉就有機會喺香港同關前輩見面。

莉莉︰ 目前恒指成分股近一半嚟自內地企業，你覺得恒指反映本土市場嘅代表性仲有幾多？

關士光︰ 40年前，我親選嘅所有成分股都係本地藍籌，依家好多已屬於大陸企業。但再諗深一層，呢個變動其實無影響到香港經濟，都唔係一件壞事。

莉莉︰ 恒指推出日只有158點，有冇驚訝恒指上到22,000點樓上？

關士光︰ 一啲都唔出奇，道指開頭都係100點起步，依家咪又升咗咁多倍，呢個屬於經濟起飛嘅現象，好正常。

莉莉︰ 有乜貼士醒畀投資者？

關士光︰ 哈！好難講，取決於每個人嘅決定，我唔可以一概而論，留畀後生一輩自己諗。

擇好日推出往後順境

莉莉︰ 講番恒指推出市場嗰日，點解會揀十一月二十四日？

關士光︰ 投資者買股票，目的都係賺錢，亮相嗰日當然要擇個好日，最理想係開市時有升幅，咁先會令人對未來有憧憬。經濟環境係一個考慮，恒指出場嗰年，經濟開始上揚，亦都係推出嘅好時機。

莉莉︰ 好開心見到你精神好好，你平時會做啲乜？

關士光︰ 我唔會夜蒲，得閒同孫兒玩樂，鍾意去啲好清靜、冇乜人打擾到嘅地方，有時都會行街，但主要都係「Window shopping」。

關前輩仲話，見證恒指大起大落，有時都幾感觸，但深信何博士嘅一句話：「任何東西跌落去，最終都會升番上嚟」。大福證券深水埗高級分行經理劉永木幹就此亦講咗一個道理，相信「經濟係向前走」，股市一定會「Up & down」（有起有跌），只要經濟好番，指數最終都會向前走。

業界老行尊歷盡變遷

為人低調嘅劉永木幹稱得上係另一位股壇老行尊，佢喺七二年已開始投資，當時恒指只有500點左右，七三年佢正式從事金融界。九十年代前電腦未盛行，佢每晚就人手畫圖睇恒指趨勢，多年嘅習慣係每晚對住電腦6至7個鐘頭，務求吸收晒所有市場消息，日日如是，高妹同佢傾完偈，都佩服佢嘅毅力。

高妹︰ 七十年代你由出市員做起，論恒指成交額及點數，同依家比簡直不能同日而語，40年來點解會有咁大嘅轉變？

劉永木幹︰當年我人手做買賣，個市全日成交額達50億至60億元已經做到好累，行家都覺得嗰日夠晒數，但自從推出「半自動對盤」及「全自動對盤」後，成交量就累升不下，就因為IT發展迅速，進一步推高港股有幾百億元嘅成交額。

高妹︰ 成交額大咗咁多，係咪冇咁易畀人造市，容易啲賺錢？

劉永木幹︰ 成交額大確實係一件好事，成交量愈大，技術分析嘅準繩度愈高。而且依家喺資訊爆炸嘅年代，好多數據出現，圖表分析準咗，造市嘅機會變得好細，但今時今日個市就複雜咗好多，你睇漏一樣嘢例如係金市及匯市，分析都會錯晒。不過，賺唔賺到錢就見仁見智，總之唔好用賭仔心態就得。

高妹︰ 見慣大起大落，相信你都變得麻木，你點睇依家嗰市？

劉永木幹︰ 「合久必分、分久必合」係企業發展嘅正常現象，以前嘅電車公司及黃埔船塢都已經被收購合併，但要係咁，股市先會有得升。我相信「萬種行情歸於市」，可以利用周線圖睇恒指今年表現，七月前好似「廚師炒菜」，一直被炒上，七月後升幅就好似一把「拉弓」，依家擔心資產泡沫會爆破，唔排除條弦會隨時斷裂，最理想當然係跌少少，再掉頭上去。

散戶壽星女同賀牛一

孖妹想趁呢個重要日子準備份生日禮物，就係搵埋與恒指一樣喺十一月二十四日出生嘅投資者，一齊恭賀恒指40歲「牛一」，呢位就係靚女散戶Norma，從事銀行工作，工餘有擔任東亞運禮儀小姐，雖然投資經驗只有一年，但恒指升跌同佢有莫大淵源。

Norma感受最深係去年十月恒指跌到谷底，當時市道好差影響佢搵工，今年祝恒指「愈升愈有」。正如恒地（00012）主席李兆基都估恒指年底見25,000點，《東方產經》網上民意調查截至上周末晚上6時，50.5%人認同「四叔」嘅睇法，但44.1%就認為唔會，剩番嘅5.4%人話唔知道。

恒指Q&A

1. 恒指推出當天嘅點數係幾多？

2. 幾時係恒指嘅「基數日」（即成立日）？

3. 由1969年成立至今，恒指累積升幅有幾多倍？

4. 恒指成立當日，包含幾多隻成分股？

5. 恒指初成立時嘅成分股係咪包括長實（00001）？

6. 恒指嘅歷史最高及最低收市點數係幾多？

7. 恒生銀行創立恒指，指數成立時有冇將恒生納入為成分股之一？

8.恒指隔幾耐檢討一次成分股？

（如果你答啱一半，代表你對恒指嘅歷史都算幾熟。）

答案

(1)158點、(2)1964年7月31日、(3)142倍、(4)30隻、(5)唔係、(6)歷史收市低位係58.61點（1967年8月31日），歷史收市高位係31,638.22點（2007年10月30日）(7)無、(8)每3個月

（莉莉）（高妹）