港股連回四日，心理上自然有少少影響，近期大市升得好，各個板塊升得好平均，累計升幅大之下，回吓氣亦屬正常，最重要係市場信心唔好失同埋「子彈」夠，咁就只有調整而無大跌。以上個禮拜五所見，股仔一啲都唔似跌市，好多都逆流炒上，似乎信心幾足，不過近期啲股仔好多時都係炒一兩日貨仔，持續性唔多夠，希望今次調整過後，市場儲番力，可以炒耐啲就好啦。
講到股仔，古晨較為鍾意上個禮拜先至郁嘅高寶綠色（00274），自八月炒過一轉後，計一計數，都已經靜咗成三個多月，上個禮拜二突然發難，造咗支小旗仔，禮拜五再抽穿，仲要升成十四個巴仙，夠晒上力。此股八月最高見過0.6元，今次打個九折都有權見0.54元啦，既然幕後咁有誠意炒上，不妨坐轉順風車，止蝕位可考慮定喺0.35元。
古晨