本文重點
亨得利控股（03389）尋日與其策略股東LVMH集團旗下嘅路威酩軒鐘錶簽代理協議，公司繼續擔任路威酩軒鐘錶中國嘅獨家代理商，除咗有名模展示旗下名錶外，集團仲邀請到內地沙畫大師劉建寧表演，運用高超技藝介紹集團歷史，都算別開生面。
中港台繼續開分店
亨得利主席張瑜平話，公司與LVMH合作多年，已經好似兩夫婦咁有默契，呢個「家庭」喺兩岸三地已有250間零售店，其中位於二線城市嘅佔56%，佔總收入61%，上月同店同比銷售錄得雙位數增長；今年已達成增設20間零售店嘅目標，明年將增設唔少於30間零售店，實行繼續做「多仔公」。
對於港台零售網絡，張總話中台經貿關係愈趨緊密，集團會加速對台投資，亦唔排除開展台灣存託憑證（TDR）業務；本港業務則以「鞏固」為基調，「二房」、「三房」地位高下立見。
余絲韻