絲絲喺上海聽擔任民企館館長嘅復星集團總裁助理孫軍講，呢15間公司包括民生銀行（01988）、蘇寧電器、華誼兄弟及分眾傳媒等，每間企業各出資2,000萬人仔，不過華誼及分眾就特別啲，出力唔出錢。

華誼出人 分眾谷廣告

咪以為呢兩間公司唔使出錢有着數，原來華誼搵咗旗下明星包括周迅、李冰冰及黃曉明等，合唱民企館「館歌」兼拍MTV，明年世博仲會輪流駐場；另外又搵名導演馮小剛為民企館拍宣傳片，以呢班明星及大導演嘅號召力，價值隨時超過2,000萬。至於做戶外媒體嘅分眾就會狂播民企館宣傳廣告，務求令全上海都知道民企館嘅存在。

孫軍仲話，有間新能源公司見到民企館搞得咁有睇頭，好想「入股」玩埋一份，依家傾緊，好快就會有結果喎。

余絲韻