本文重點
大家都熱切期待渣打集團（02888）喺印度上市，其實渣打嘅發展重點一向都喺新興市場，所以佢哋不嬲對待印度大客如珠如寶，最近仲搞咗個彩燈節晚會，本身係印度人嘅渣打銀行亞洲區行政總裁白承睿都親自到場一齊慶祝。
印度最重要節慶
呢個晚會原來係慶祝印度Diwali彩燈節，呢個節日係印度曆法上最重要嘅節慶，標誌着Kartika亮燈期嘅開始。渣打私人銀行一向都會為喺香港嘅印度客搞活動，一慰佢哋思鄉之情，今次晚會仲特登請咗近200名高資產值嘅投資者一齊參加。大家見到白承睿同聲同氣，當然非常親切，除咗佢之外，渣打私人銀行環球總裁費乃威、渣打私人銀行東北亞區主管艾雲士都親自到場，分享吓渣打喺香港、印度及中國作出嘅長遠承諾。
其實本港嘅印度人一向係帶動渣打私人銀行增長嘅非常重要一環，銀行當然對佢哋服務周到。艾雲士仲話，一定要滿足印度人日趨精益求精嘅理財需要，並彰顯渣打與印度人建立長遠關係嘅決心。
余絲韻