本文重點
滙控（00005）股價今年三月九日跌至33蚊驚嚇價，成個市場恍如世界末日，好彩「大笨象」憑藉首9個月業績好過預期而再度起飛，近日逼近100蚊大關，股民亦可放下心頭大石。
「大笨象」實力獲認同
就嚟係滙豐亞太區行政總裁嘅王冬勝尋日亦話終可舒一口氣，佢回想年初供股時，金融市場情況好差，但「大笨象」亦無接受任何政府嘅打救。依家經濟逐步回穩，集團嘅實力獲外界認同，加上最近公布季度業績好過預期，所以股價升得較快，作為員工嘅佢都覺得好開心，但另方面，佢又話會有啲壓力，因為未來要做得更好。
王冬勝向來好受本港傳媒歡迎，佢每次出場，鎂光燈都閃個不停，咁多年應該慣晒，佢尋日畀大批攝記影完一輪後，突然話喺英國時於同樣場合只有一架相機出現面前，仲係好耐先至影一張相，估計喺香港影一秒鐘相，等於佢喺英國影10年相喎。
余絲韻