加入滙控一年飛7轉

張建東喺○七年做咗新地獨立非執董後，多咗好多公職及董事職務，好似佢喺今年二月出任滙控（00005）獨立非執董，佢話自己呢一年要「飛」7次去英國開董事會。根據滙控嘅公告，張建東每年有6.5萬英鎊嘅董事袍金。

除咗滙控獨立非執董外，佢加入新地後，其他新公職仲包括喺○八年出任機管局主席（佢之前係機管局董事）以及科技大學校董會主席等。張建東話自己咁多會要開，所以喺新地就唔再尋求連任董事職務。絲絲問佢今次退任與郭氏家族有冇關係，佢就話冇。順帶一提，新地喺尋日獲財經雜誌《Euromoney》頒發「香港最佳地產公司」榮譽，已蟬聯五屆，絲絲亦唔相信佢離任與新地有關。

張建東依家仲係恒生（00011）、香港興業（00480）及港交所（00388）獨立非執董。佢喺○三年辭去畢馬威會計行中國及香港主席一職後，就過住半退休嘅生活，平時鍾意打高球、旅遊及睇電影嘅佢有咁多公職，睇怕打波嘅時間都唔多啦！

余絲韻