大市升咗咁多日，都係時候抖一抖，指數高位略有整固，而個股就轉炒個別。大市氣氛麻麻哋，但見部分股份仲係炒味濃，似乎未升夠。當然市場上亦有唔少股份略回吐啦，不過回吐幅度就真係濕濕碎，沽壓一啲都唔大。古晨覺得現時市場好多人都患咗缺貨恐懼症，除非大市有個深度調整，唔係都幾難叫沽番啲貨出來。
內地經濟起飛，試問一般小市民有邊個唔想一朝發達?因此內地都推出咗唔少彩票，由於市場需求強勁，整體彩票一年銷售額可以過千億元，而且仲以每年三成增長速度咁發展，咁大個市場，難怪連啲基金都睇好啲彩票股。第一視頻（00082）過去半年已率先跑出，相對同一概念嘅御泰中彩（00555），就相當落後，尋日突然逆市抽升，似乎要抽穿0.76元嘅頂位，一旦破位上望1元有何難，止蝕位不妨考慮設在0.65元。
古晨