先問你一個問題，依家電視黃金時間兩線劇集，一套宮廷背景，講攻心計，另一套用銀行家族做題材，你認為我班同事追看邊套？據非正式統計，答案出乎我意料係熱捧宮廷劇集，講銀行嗰套劇集反而無乜人睇。

唔少同事都覺得宮廷劇集非常反映職場實況，道出每日返工需要用到嘅「生存技巧」，反而銀行劇集根本唔係講緊實況，評語係：「銀行邊係咁㗎！」

股票炒起靠動聽故事

套宮廷劇我一集都無睇過，銀行劇都只係間中睇過幾集（手腳慢，夜放工），講內幕交易同畀人狙擊，都會喺現實中出現。但人鍾意「故事」多於「事實」，睇電視如是，買股票如是，記唔記得有啲股票市盈率可以炒到過百倍，都只係因為一個新鮮概念，一個動聽故事，要炒起一隻股票，概念比業績值錢。

業績實實在在，賺幾多蝕幾多有眼睇，股票值幾錢都有數計。概念則徘徊喺驚喜與驚嚇之間，結果可以出人意表。又要聲明，對於業績、收購、招股，都唔係我工作內容，市傳點樣組班收購我亦一概不知。只想你明白，唔同類型消息對股票有唔同影響，邊樣啱你自己決定。

我唯一可以爆嘅內幕係，近排身邊同事興起玩「買殼」，有興趣你都不妨玩吓。一個iPhone殼只需30蚊，多色，啱襯衫。

大健