訪星級專家 唱好韓股
十一月初，天涼、晴。
嚟到首爾，第一件要做嘅事就係問路。韓國人特別好客兼熱情，當佢哋知你唔識路，即使係睇緊舖抑或掃緊地，佢哋都會放低手頭上嘅工作，帶你到目的地，孖妹係咁話「唔好意思、唔使麻煩」，佢哋都唔理，最後發現推搪嘅絕招就係一句「No way」，咁韓國人就唔會強人所難。
今朝早麻煩咗一位喺韓國工作15年嘅美國人Todd帶路，佢帶我哋到「63大廈」附近，孖妹要見一個朋友，佢係未來資產證券韓國研究中心主管黃相淵（Sean），曾拎過6年最佳分析員獎，同時負責韓美經貿往來嘅協議（FTA）。
高妹︰ Ann-yeong-ha-se-yo（韓文：「你好」），韓國股市呢排興玩啲乜嘢板塊？
Sean︰ 近期韓國有兩大投資主題，就係IT股及汽車股。相比美國本土車廠，韓國出產嘅輕型汽車生意更好。
莉莉︰ 不過呢類股份都被人炒完一轉，仲有幾多上升水位呢？
Sean︰ 依家估值仲係便宜，我睇股東權益回報率（ROE）可以升多10%至12%。我點解咁講？係因為九七至九八年期間，韓國公司借貸平均槓桿水平達800%，經過金融危機洗禮後，比例瞬間跌到現時嘅250%，我相信喺未來2至3年，隨着金融股復甦，公司借貸槓桿水平逐漸擴大，理論上當負債逐漸增多時，股東嘅資本會降低，ROE就會上升，刺激股價向上。我估計，韓國首爾綜合指數喺明年之前可再升20%。
韓國人最大財產係間屋
高妹︰ 睇番港股，上星期有11隻恒指成分股升穿52周高位，好多公司嘅ROE都超出過往水平，反映盈利能力回復得七七八八，但港人愛股滙控（00005）嘅ROE仲未重回○七年水平（見附表）。
莉莉︰ 我對大市及滙控都有信心，要快啲趁個市回調時入番啲貨。
Sean︰ 哈！韓國人近排嘅風險胃納都提升咗，一啲派息較高嘅股票掛鈎證券（ELS）都好受歡迎，包括掛鈎相關中國投資嘅ELS都多咗人問津。不過，韓國人唔識分散投資，多數係活躍於房地產市場，你睇韓國嘅退休金規模比其他國家細咁多就明白。佢哋最大嘅財產就係自己間屋，差唔多將九成資產用嚟買樓，若年老時退休金唔夠用，但又需要維持生計，就會賣咗間屋繼續生活。
取中庸之道 勝在安全
高妹︰ 韓國樓價都升咗好多，咁你自己層樓會唔會賣？
Sean︰ 依家樓價可以與○七年媲美，情況就好似日本「迷失十年」前夕嘅一九九○年，樓價平均已經達到國民全年收入嘅10倍，跟住樓市泡沫就爆破。但我對樓市仲好有信心，現時韓國經濟未完全反映出嚟，估計明年首季政府先會加息25至50點子，阻止樓市「爆煲」。哈！所以我自己層樓都唔考慮放住。
高妹︰ 股價樓價都咁高，我就唔敢再入市，都係先行獲利，賺番啲錢交吓稅。Gam-sa-ham-ni-da（韓文：「唔該晒」）。
早上訪問完，晚上吃喝玩樂。孖妹重遇今朝早帶路嘅好心人Todd，佢帶咗我哋去一間老字號食泡菜石頭鍋飯及人參雞。Todd喺投資上最大嘅資產都係層樓，問佢點解留喺韓國工作，佢話自己都冇諗過留咁耐，其實喺韓國工作唔難，韓國人做事採取中庸之道，你睇街上嘅汽車大多係黑、白、銀3隻色就知，佢哋做事態度係唔要太露鋒芒，又唔好排包尾，總之處於中游位置就最安全。
散戶積極 追上唔追落
其實炒股最好都係採取中庸之道，見到買入訊號先入市，追上唔追落，而近排魚缸散戶就好積極，見恒指小回就入貨。致富證券九龍城分行經理趙德鴻話，依家散戶都夠膽買貨，恒指合理價係22,000點，個市唔會跌得太多，目標位睇23,300點。除此之外，股友呢排都積極抽新股，據今期《東方產經》網上民意調查，截至上周末晚上6時，有興趣認購三一重裝（00631）、金沙中國（01928）、花樣年（01777）及民生銀行（01988）嘅股友分別有9.2%、6%、12.5%和60.9%，唔考慮抽嘅只有11.4%。
莉莉、高妹
若有料報畀高妹同莉莉或有嘢問，可電郵money.biz@opg.com.hk