近期資金繼續熱炒重組概念，由於中央一直有心讓央企整體上市，紅籌股配合政策亦加快重組步伐，先有上實系，繼而輪到五礦系、航天系等等，總之注資大過天，完成阿爺使命最重要。
最新扯上重組消息嘅，正正係北京控股（00392）一系，其母公司北控集團在○七年自我完成重組後，先將燃氣項目注入北控，有意打造成燃氣旗艦，去年又搞起隻北控水務（00371），仲講明下年嘅注入事宜添。
至於一直跟隨北控多年嘅北京發展（00154），近日亦傳將會大變身。由於現時只持有北京「一卡通」一項業務，可塑性十分高，以北控集團六大業務隨便開一瓣，身價即時唔同晒。難怪近期股價密密係咁升，仲記得○七年話注資時，股價曾高見過5蚊，暫時睇住一半先都有2.5元，止蝕位可以考慮放1.3元。
古晨