本地魚缸上周五未受花旗魚缸周四晚下跌所拖累，反而在火車頭大笨象（00005）帶領下，保持升勢，恒指在22,500點水平徘徊。資金繼續湧入香江，金管局在上周五又再向錢莊體系注資，明日錢莊體系結餘將增至3,152.9億元，又再創新高。古勝認為好友正儲存力量，本周恒指大有機會衝破23,000點水平。

紅色分子齊開派對

近日本地魚缸較受歡迎的，除咗係一洗頹氣的大笨象外，紅色分子的紅籌組老前輩加快重組步伐，鑊鏟派對接二連三舉行。先有「多呢咪」越投（00123），航天孖寶中的航天萬源（01185）亦成功批盪集資，料為收購重組作好準備。航天萬源上周五再創52周新高，線人來料叫坐定定，首個目標1.5元無走雞，屆時或有注資收購公告天下，上望2元目標唔過分，較現價還有六成上升空間。

本地魚缸邁向二萬三關，尋找落後股份有更大勝算，畢竟夠膽高追屢創新高的股份，需要較大勇氣，尤其在過去半年升浪中，未嘗甜頭者，更不願入場高追。古勝今日推介中國澱粉（03838），上周五走勢突破，公仔圖表出現黃金交叉，相信新高可期。

作為中國三大玉米澱粉供應商之一的中國澱粉，大部分的玉米深加工及玉米製產品在中國出售，部分則出口至亞洲、北美洲、中美洲、南歐、北歐及中東國家。集團較早前派發截至六月底止半年成績表，錄得純利6,053.4萬元（人仔‧下同），按年倒退19.3%，每股盈利2.32分，不派中期息。隨住經濟復甦，市場對產品需求大為增加，集團的盈利表現下半年得到顯著改善。

大型企業洽談合作

中國澱粉雖然業績倒退兩成，但在同業中表現係最好，西王糖業（02088）半年盈利大幅倒退99%；大成生化（00809）六月底時發盈利預警，指半年收入至少下跌35%，並會錄得虧損。以業績來比較，中國澱粉雖然下跌，但跌幅唔夠兩成，已經係冧巴溫。睇番股價表現，過往半年大成股價由0.8元升至2元，升幅達1.5倍；西糖由1元升至2元，亦有1倍的升幅。相反，業績最好的中澱股價由0.5元升至0.8元，升幅六成，點計都唔啱數，股價大落後。最近有缸湖傳聞，有紅色背景企業，洽談玉米深加工領域的重大合作，唔排除中澱會借消息炒番轉，對股價短期帶來刺激。

古勝